ກອງປະຊຸມໃຫຍ່ ຄັ້ງທີ IV ຂອງໜ່ວຍພັກຮາກຖານກົມປະກັນຄຸນນະພາບການສຶກສາ
ໃນຕອນເຊົ້າຂອງວັນທີ 31 ຕຸລາ 2024 ທີ່ຜ່ານມາ ຢູ່ທີ່ຫ້ອງປະຊຸມຊັ້ນ 3 ກະຊວງສຶກສາທິການ ແລະ ກິລາ (ເຂດເຈົ້າອານຸວົງ) ໜ່ວຍພັກຮາກຖານກົມປະກັນຄຸນນະພາບການສຶກສາ ໄດ້ຈັດກອງປະຊຸມໃຫຍ່ ຄັ້ງທີ IV ຂອງຕົນຂຶ້ນ ພາຍໃຕ້ການເປັນປະທານຮ່ວມຂອງ ສະຫາຍ ປອ ສໍາລານ ພັນຄະວົງ ຮອງເລຂາຄະນະບໍລິຫານງານພັກ, ຮອງລັດຖະມົນຕີກະຊວງສຶກສາທິການ ແລະ ກິລາ, ສະຫາຍ ບຸນມີ ຈັນທະອຸດົມ ຄະນະພັກກະຊວງ ປະທານກວດກາ ຫົວໜ້າກົມກວດກາ, ຮອງຫົວໜ້າ ຄະນະຮັບຜິດຊອບກະກຽມ ແລະ ດໍາເນີນກອງປະຊຸມໃຫຍ່ 3 ຂັ້ນ ຂອງພັກ ທີ່ຂຶ້ນກັບອົງຄະນະພັກກະຊວງສຶກສາທິການ ແລະ ກິລາ (ກຸ່ມ4) ແລະ ສະຫາຍ ປັນຍາ ຈັນທະວົງ ຮອງເລຂາໜ່ວຍພັກຮາກຖານ ວ່າການແທນ ຫົວໜ້າກົມປະກັນຄຸນນະພາບການສຶກສາ, ກະຊວງສຶກສາທິການ ແລະ ກິລາ. ໂດຍມີ ຜູ້ເຂົ້າຮ່ວມລວມທັງໝົດ 48 ສະຫາຍ (ຍິງ 18), ໃນນັ້ນ ມີສະມາຊິກພັກທີ່ເປັນຜູ້ແທນສົມບູນ 23 ສະຫາຍ (ຍິງ 10), ສະມາຊິກພັກສໍາຮອງ 3 ສະຫາຍ (ຍິງ 2), ສະມາຊິກພັກບໍານານ 4 ສະຫາຍ (ຍິງ 1) ແລະ ແຂກຖືກເຊີນຈາກໜ່ວຍພັກອ້ອມຂ້າງ ແລະ ຄະນະຕິດຕາມຊຸກຍູ້ 18 ສະຫາຍ (ຍິງ 5).
ກອງປະຊຸມໃຫຍ່ ໄດ້ຮັບຟັງ ການຜ່ານຮ່າງ ບົດລາຍງານການເມືອງ ແລະ ທິດທາງລວມ, ຄາດໝາຍສູ້ຊົນ ແລະ ວຽກຈຸດສຸມ ໃນໄລຍະ 5 ປີ ຕໍ່ໜ້າ, ບົດສໍາຫຼວດການນໍາພາລວມຂອງຄະນະໜ່ວຍພັກຮາກຖານ ຄັ້ງທີ III ນໍາສະເໜີ ໂດຍສະຫາຍ ປັນຍາ ຈັນທະວົງ, ຊຶ່ງໄດ້ຕີລາຄາໃຫ້ເຫັນ ດ້ານດີ, ດ້ານອ່ອນ, ຂໍ້ຄົງຄ້າງ, ສາເຫດ, ບົດຮຽນທີ່ຖອດຖອນໄດ້ ໃນການຊີ້ນຳ-ນຳພາ ໃນຕະຫຼອດໄລຍະ 5 ປີ ທີ່ຜ່ານມາ ນັບແຕ່ປີ 2019 ຫາປີ 2024. ແລະ ທິດທາງແຜນການ 5 ປີ (2025 – 2029).
ຕໍ່ຈາກນັ້ນ, ຜູ້ແທນກອງປະຊຸມ ໄດ້ພ້ອມກັນໃຊ້ສິດປະຊາທິປະໄຕຂອງຕົນ ປ່ອນບັດເລືອກເອົາຄະນະໜ່ວຍພັກຮາກຖານກົມປະກັນຄຸນນະພາບການສຶກສາ ຊຸດໃໝ່ ບົນພື້ນຖານມາດຕະຖານ ແລະ ເງື່ອນໄຂ ທີ່ກໍານົດໄວ້ໃນມະຕິຕົກລົງອະນຸມັດລາຍຊື່ ບຸກຄະລາກອນ ທີ່ສະໝັກເລືອກຕັ້ງ.
ໃນຕອນທ້າຍຂອງກອງປະຊຸມ ຜູ້ແທນໄດ້ ລົງປະຊາມະຕິ ຮັບຮອງເອົາຮ່າງບົດລາຍງານການເມືອງ, ບົດສໍາຫຼວດການນໍາພາລວມ ແລະ ມະຕິກອງປະຊຸມໃຫຍ່ ຄັ້ງທີ lV ໜ່ວຍພັກຮາກຖານກົມປະກັນຄຸນນະພາບການສຶກສາ ລວມທັງຜົນຂອງກອງປະຊຸມຄັ້ງປະຖົມມະລຶກທີ່ໄດ້ເລືອກເອົາ ສະຫາຍ ປັນຍາ ຈັນທະວົງ ເປັນເລຂາ, ສະຫາຍ ພົນມະນີ ສີລິພົງ ເປັນຮອງເລຂາ ແລະ ສະຫາຍ ດາວີ ວືວາຊົວ ເປັນຜູ້ກວດກາ ໜ່ວຍພັກຮາກຖານກົມປະກັນຄຸນນະພາບການສຶກສາ. ພ້ອມທັງຮັບຟັງການໂອ້ລົມ ຈາກ ສະຫາຍ ປອ. ສໍາລານ ພັນຄະວົງ ຮອງເລຂາຄະນະບໍລິຫານງານພັກ, ຮອງລັດຖະມົນຕີ ກະຊວງສຶກສາທິການ ແລະ ກິລາ.
