Reporting the evaluation results of the Education Law implementation to the National Assembly

ໃນຕອນເຊົ້າຂອງວັນທີ 20 ກັນຍາ 2024 ທີ່ຫ້ອງປະຊຸມ ສະພາແຫ່ງຊາດ, ໄດ້ມີກອງປະຊຸມລາຍງານຜົນການປະເມີນ ການຈັດຕັ້ງປະຕິບັດກົດໝາຍວ່າດ້ວຍການສຶກສາ ພາຍໃຕ້ການເປັນປະທານຂອງ ທ່ານ ຄໍາໃບ ດໍາລັດ ກໍາມະການສູນກາງພັກ, ຮອງປະທານສະພາແຫ່ງຊາດ, ເຂົ້າຮ່ວມກອງປະຊຸມມີ ທ່ານ ບຸນຕາ ເທບພະວົງ ປະທານຄະນະກໍາມາທິການວັດທະນະທໍາ ແລະ ສັງຄົມ, ບັນດາທ່ານຮອງປະທານ, ທ່ານຫົວໜ້າກົມວັດທະນະທໍາ, ທ່ານຫົວໜ້າກົມສັງຄົມ ແລະ ພະນັກງານວິຊາການທີ່ກ່ຽວຂ້ອງຂອງສະພາແຫ່ງຊາດ; ມີທ່ານ ຮສ. ປອ. ພຸດ ສິມມາລາວົງ ກໍາມະການສູນກາງພັກ, ລັດຖະມົນຕີ ກະຊວງສຶກສາທິການ ແລະ ກິລາ, ທ່ານຫົວໜ້າຫ້ອງການ, ຫົວໜ້າກົມຈັດຕັ້ງ ແລະ ພະນັກງານ, ວ່າການແທນຫົວໜ້າກົມປະກັນຄຸນນະພາບການສຶກສາ, ຫົວໜ້າກົມການເງິນ, ບັນດາຄະນະກົມ, ຄະນະພະແນກ ແລະ ວິຊາການກ່ຽວຂ້ອງຈາກກະຊວງສຶກສາທິການ ແລະ ກິລາ ເຂົ້າຮ່ວມ.

ທ່ານ ຮສ. ປອ. ພຸດ ສິມມາລາວົງ ໄດ້ຕາງໜ້າກະຊວງສຶກສາທິການ ແລະ ກິລາ ຂຶ້ນລາຍງານ ເຊິ່ງ ກົດໝາຍວ່າດ້ວຍການສຶກສາ ສະບັບທໍາອິດ ໄດ້ຖືກຮັບຮອງ ແລະ ປະກາດໃຊ້ໃນປີ 2000, ໄດ້ປັບປຸງໃໝ່ ເປັນສະບັບປີ 2007 ແລະ ສະບັບປັດຈຸບັນ ແມ່ນ ສະບັບປີ 2015. ຜ່ານການຈັດຕັ້ງປະຕິບັດເປັນໄລຍະເວລາ 9 ປີກວ່າ, ກະຊວງສຶກສາທິການ ແລະ ກິລາ ໄດ້ເອົາໃຈໃສ່ ໂຄສະນາເຜີຍແຜ່ ໂດຍໄດ້ແປເປັນພາສາອັງກິດ ແລະ ຈັດພິມ ເປັນຈໍານວນ 40,000 ຫົວ ເພື່ອແຈກຢາຍພາຍໃນຂະແໜງການສຶກສາທິການ ແລະ ກິລາ ແຕ່ສູນກາງຮອດທ້ອງຖິ່ນ ໃນຂອບເຂດທົ່ວປະເທດ; ໄດ້ຜັນຂະຫຍາຍເປັນນິຕິກໍາລຸ່ມກົດໝາຍ ທັງໝົດຈໍານວນ 74 ສະບັບ ເປັນຕົ້ນ ດໍາລັດ 12 ສະບັບ, ຂໍ້ຕົກລົງ 51 ສະບັບ, ຄໍາສັ່ງ 03 ສະບັບ, ຄໍາແນະນໍາ 05 ສະບັບ ແລະ ແຈ້ງການ ຈໍານວນ 03 ສະບັບ. ພ້ອມດຽວກັນ ກໍໄດ້ເອົາໃຈໃສ່ຕິດຕາມກວດກາ ແລະ ຊຸກຍູ້ໃຫ້ທຸກພາກສ່ວນຂອງສັງຄົມ, ຜູ້ບໍລິຫານການສຶກສາ, ຄູ ແລະ ພະນັກງານບໍລິຫານຂອງສະຖານການສຶກສາທັງພາກລັດ ແລະ ເອກະຊົນ ເອົາໃຈໃສ່ຈັດຕັ້ງປະຕິບັດກົດໝາຍ ແລະ ນິຕິກຳລຸ່ມກົດໝາຍ ເພື່ອເຮັດໃຫ້ການຄຸ້ມຄອງວຽກງານການສຶກສາ ມີປະສິດທິພາບ, ປະສິດທິຜົນ. 

ເຖິງຢ່າງໃດກໍຕາມ, ການຈັດຕັ້ງປະຕິບັດກົດໝາຍດັ່ງກ່າວ ຍັງມີຄວາມຫຍຸ້ງຍາກ ແລະ ພົບກັບຫຼາຍບັນຫາ ເປັນຕົ້ນ: ການຈັດຕັ້ງປະຕິບັດນະໂຍບາຍຖືເອົາການສຶກສາພາກບັງຄັບ ເປັນການສຶກສາບໍ່ໄດ້ເສຍຄ່າໃນສະຖານການສຶກສາຂອງລັດ, ການຈັດຕັ້ງປະຕິບັດຕົວຈິງເຫັນວ່າ ມີໂຮງຮຽນຈໍານວນໜຶ່ງໄດ້ເກັບເງິນນໍານັກຮຽນເພື່ອຮັບໃຊ້ວຽກງານບໍລິຫານໂຮງຮຽນ ແລະ ນໍາໃຊ້ເຂົ້າໃນການຮຽນ-ການສອນ; ສິດໄດ້ຮັບການສົ່ງເສີມສຸຂະພາບ ແລະ ການປິ່ນປົວຂັ້ນພື້ນຖານໂດຍບໍ່ເສຍຄ່າສໍາລັບການສຶກສາພາກບັງຄັບ, ພາກປະຕິບັດຕົວຈິງ ຍັງປະຕິບັດບໍ່ໄດ້ຢ່າງທົ່ວເຖິງ; ອັດຕາການປະລະຂອງຄູ ແລະ ນັກຮຽນ ຂອງການສຶກສາພາກບັງຄັບ ເຫັນວ່າເພີ່ມຂຶ້ນທຸກໆປີເມື່ອສົມທຽບໃສ່ໄລຍະປີ 2017 ເຊິ່ງສາເຫດມາຈາກສະພາບເສດຖະກິດ, ຄວາມຮັບຜິດຊອບຂອງຄອບຄົວ ແລະ ສັງຄົມ; ການລົງໂຄສະນາເຜີຍແຜ່ກົດໝາຍຍັງມີຂີດຈໍາກັດ; ງົບປະມານແຫ່ງລັດທີ່ກໍານົດໃຫ້ຂະແໜງສຶກສາທິການ ແລະ ກິລາ ບັນລຸ 18 ສ່ວນຮ້ອຍຂຶ້ນໄປ, ເຫັນວ່າການຈັດຕັ້ງປະຕິບັດຕົວຈິງ ຍັງບໍ່ທັນບັນລຸຕາມຄາດໝາຍທີ່ວາງໄວ້; ອາຄານໂຮງຮຽນ ແລະ ຫໍພັກຂອງສະຖານການສຶກສາຈໍານວນໜຶ່ງ ຍັງບໍ່ພຽງພໍ ແລະ ຫໍພັກບາງໂຮງຮຽນແມ່ນສ້າງຂຶ້ນຊໍາຊາ ບໍ່ຮັບປະກັນຄວາມປອດໄພໃຫ້ແກ່ນັກຮຽນ.