ຝຶກອົບຮົມຄູຝຶກຂັ້ນທ້ອງຖິ່ນ ກ່ຽວກັບ ມຄພ. ຊັ້ນອະນຸບານ ໃຫ້ແກ້ພະນັກງານປະກັນຄຸນນະພາບ 8 ເມືອງ ທົ່ວແຂວງສາລະວັນ
ໃນວັນທີ 09-13 ກັນຍາ 2024 ທີ່ຜ່ານມາ ກົມປະກັນຄຸນນະພາບການສຶກສາ ໄດ້ຈັດກອງປະຊຸມຝຶກອົບຮົມຄູຝຶກຂັ້ນແຂວງ ແລະ ຂັ້ນເມືອງກ່ຽວກັບການພັດທະນາໂຮງຮຽນຕາມມາດຕະຖານຄຸນນະພາບການສຶກສາຂັ້ນພື້ນຖານ (ມຄພ) ຊັ້ນອານຸບານສຶກສາ ຂຶ້ນພາຍໃຕ້ການເປັນປະທານຂອງ ທ່ານ ປັນຍາ ຈັນທະວົງ ວ່າການແທນ ຫົວໜ້າກົມປະກັນຄຸນນະພາບການສຶກສາ ກະຊວງສຶກສາທິການ ແລະ ກິລາ ແລະ ທ່ານ ຄໍາເຟືອງ ອິນທິສອນ ຮອງຫົວໜ້າພະແນກສຶກສາທິການ ແລະ ກິລາ ແຂວງສາລະວັນ ປະທານຮ່ວມ, ມີຜູ້ເຂົ້າຮ່ວມ ທີ່ເປັນຄູຝຶກຈາກກົມປະກັນຄຸນນະພາບການສຶກສາ ແລະ ວິທະຍາໄລຄູສາລະວັນ, ແລະ ນັກສໍາມະນາກອນ ທີ່ມາຈາກຂະແໜງກ່ຽວຂ້ອງພາຍໃນພະແນກ ສກຂ ສາລະວັນ, ຄະນະຫ້ອງການສຶກສາທິການ ແລະ ກິລາເມືອງ ພ້ອມຫົວໜ້າໜ່ວຍງານທີ່ກ່ຽວຂ້ອງ ຂອງ 8 ເມືອງ ທົ່ວແຂວງສາລະວັນ ລວມຜູ້ເຂົ້າຮ່ວມທັງໝົດຈໍານວນ 77 ທ່ານ, ຍິງ 30 ທ່ານ.
ຈຸດປະສົງຂອງກອງປະຊຸມແມ່ນເພື່ອ ໃຫ້ສຳມະນາກອນຮັບຮູ້ ແລະ ເຂົ້າໃຈຂັ້ນຕອນ ແລະ ວິທີການຕ່າງໆ ຂອງການພັດທະນາໂຮງຮຽນຕາມ ມຄພ ຊັ້ນອະນຸບານສຶກສາ ແລະ ໃຫ້ຄູຝຶກຂັ້ນແຂວງ ແລະ ຂັ້ນເມືອງ ສາມາດນຳເອົາຄວາມຮູ້ ທີ່ໄດ້ຈາກການຝຶກອົບຮົມໄປຝຶກອົບຮົມຕໍ່ໃຫ້ ຜອ, ຄູ ແລະ ຜູ້ດູແລເດັກ ໃນໂຮງຮຽນເປົ້າໝາຍ ຊຶ່ງໃນຕໍ່ໜ້າ, ເມືອງຕະໂອ້ຍ, ເມືອງສາລະວັນ ແລະ ເມືອງລະຄອນເພັງ ຈະໄດ້ຮັບການສະໜັບສະໜູນຈາກອົງການຍູນີເຊັບ ໃນການສືບຕໍ່ສ້າງຄວາມເຂັ້ມແຂງໃຫ້ແກ່ຜູ້ອໍານວຍການ ແລະ ຄູສອນ ໃນຊັ້ນອະນຸບານສຶກສາ ເພື່ອປັບປຸງຄຸນນະພາບການສຶກສາ ໃນ 3 ເມືອງເປົ້າໝາຍດັ່ງກ່າວຕໍ່ໄປ. ສໍາລັບ 5 ເມືອງອື່ນ ເຊັ່ນ ເມືອງວາປີ, ເມືອງເລົ່າງາມ, ເມືອງຕຸ້ມລານ, ເມືອງສະໝ້ວຍ ແລະ ເມືອງຄົງເຊໂດນ ກົມປະກັນຄຸນນະພາບການສຶກສາ ຈະສືບຕໍ່ປະສານສົມທົບກັບພາກສ່ວນກ່ຽວຂ້ອງ ແລະ ບັນດາຄູ່ຮ່ວມພັດທະນາ ເພື່ອສ້າງຄວາມເຂັ້ມແຂງໃຫ້ຜູ້ບໍລິຫານຫານສຶກສາ ແລະ ຊຸກຍູ້ການປັບປຸງຄຸນນະພາບການສຶກສາ ໃຫ້ເປັນຮູບປະທໍາຂຶ້ນກວ່າເກົ່າ ແຕ່ກໍໄດ້ຮຽກຮ້ອງໃຫ້ທັງ 5 ເມືອງ ໃຫ້ຍົກສູງຄວາມເປັນເຈົ້າການ ແລະ ແນວຄິດລິເລີ່ມ ໃນການປັບປຸງຄຸນນະພາບການສຶກສາ ພາຍໃຕ້ຄວາມຮັບຜິດຊອບຂອງຕົນຕື່ມ.
ຜ່ານການຝຶກອົບຮົມ ມາເປັນເວລາ 5 ວັນ ເຫັນວ່າ ສໍາມະນາກອນເຂົ້າໃຈ ແລະ ສາມາດອະທິບາຍໄດ້ເນື້ອໃນຂອງຄູ່ມືຄູຝຶກຂັ້ນແຂວງ, ຂັ້ນເມືອງ ຕາມ ມຄພ ຊັ້ນອະນຸບານສຶກສາ ເຊິ່ງແມ່ນ ສອດຄ່ອງກັບໜ້າວຽກຕົວຈິງຂອງຄູສອນຊັ້ນ ອະນຸບານສຶກສາ, ສໍາມະນາກອນ ສາມາດນໍາເອົາເນື້ອໃນຂອງຫຼັກສູດ ໄປຝຶກອົບຮົມໃຫ້ ຜູ້ອໍານວຍການ ຫຼື ຫົວໜ້າໂຮງຮຽນ ແລະ ນໍາພາປະເມີນຕົນເອງຂອງໂຮງຮຽນ ແລະ ຂຽນແຜນພັດທະນາໂຮງຮຽນໄດ້; ສໍາມະນາກອນເອົາໃຈໃສ່ ຕັ້ງໃຈຄົ້ນຄວ້າຮ່ຳຮຽນດີ ພໍສົມຄວນ ມັນສະແດງອອກໃນຜົນການປະເມີນຄວາມເຂົ້າໃຈ ຂອງບັນດາ ທ່ານທີ່ໃນແຕ່ລະວັນ ລວມເປີເຊັນປະເມີນຄວາມເຂົ້າໃຈ 3 ວັນ ມີດັ່ງນີ້:
ເຂົ້າໃຈ ຫຼາຍ ເຂົ້າໃຈ ປານກາງ ເຂົ້າໃຈ ໜ້ອຍ
ມື້ທີ 1: 43% 53% 4%
ມື້ທີ 2: 60% 40% 0%
ມື້ທີ 3: 69% 31% 0%
ຈາກຜົນການປະເມີນໃນການຝຶກຕົວຈິງ ໃນ 3 ວັນ ທໍາອິດ ເຫັນວ່າ ຜູ້ເຂົ້າຮ່ວມຈໍານວນໜຶ່ງຍັງເຂົ້າໃຈຍາກ ກ່ຽວກັບການກໍານົດຊື່ກິດຈະກໍາ ເພື່ອປັບປຸງຄຸນນະພາບ ໃນແຕ່ລະວຽກຈຸດສຸມ ເພື່ອໃຫ້ບັນລຸຕາມຄາດໝາຍທີ່ກໍານົດໄວ້; ຄູຝຶກໄດ້ ເພີ່ມເວລາໃຫ້ຫຼາຍຂຶ້ນຕື່ມ ໃນການອະທິບາຍ, ເພີ່ມຕົວຢ່າງໃນການຂຽນແຜນພັດທະນາໂຮງຮຽນ, ເພີ່ມເວລາສົນທະນາແລກປ່ຽນຄໍາຄິດເຫັນກັນ ແລະ ໃຊ້ເວລາຄົ້ນຄວ້າໃຫ້ຫຼາຍຂຶ້ນ ກວ່າເກົ່າ ໃນ 2 ວັນທີ່ຍັງເຫຼືອ ຊຶ່ງເຮັດໃຫ້ນັກສໍາມະນາກອນ ມີຄວາມເຂົ້າໃຈດີຂຶ້ນ ແລະ ມີຄວາມໝັ້ນໃຈໃນລະດັບສູງ ທີ່ຈະນໍາເອົາຄວາມຮູ້ຄວາມສາມາດທີ່ໄດ້ຮັບໃນຄັ້ງນີ້ ໄປຜັນຂະຫຍາຍໃສ່ວຽກງານທີ່ຕົນຮັບຜິດຊອບ ເວົ້າລວມ, ເວົ້າສະເພາະ ແມ່ນການນໍາພາ ບັນດາສະຖານການສຶກສາກ່ອນໄວຮຽນ ໃນເຂດຄວາມຮັບຜິດຊອບຂອງຕົນ ປັບປຸງຄຸນນະພາບການສຶກສາ ໃຫ້ດີຂຶ້ນເປັນກ້າວໆ.
ໃນວະລາສຸດທ້າຍກອງປະຊຸມ, ກົມປະກັນຄຸນນະພາບການສຶກສາໄດ້ມອບຄອມພີວເຕີໂນດບຸກ ໃຫ້ແກ່ ຫ້ອງການສຶກສາ ແລະ ກິລາເມືອງ ມີ 7 ເມືອງ: ເມືອງສາລະວັນ, ເມືອງລະຄອນເພັງ, ເມືອງວາປີ, ເມືອງເລົ່າງາມ, ເມືອງຕຸ້ມລານ, ເມືອງສະ ໝ້ວຍ ແລະ ເມືອງຄົງເຊໂນ ເມືອງລະໜ່ວຍ ເຊິ່ງແມ່ນ ທ່ານ ຄໍາເຟືອງ ອິນທິສອນ ຮອງຫົວໜ້າພະແນກສຶກສາທິການ ແລະ ກິລາແຂວງສາລະວັນ ເປັນຕົວແທນຮັບເອົາຄອມພີວເຕີ້ ດັ່ງກ່າວ ເພື່ອມອບຕໍ່ໃຫ້ພະນັກງານປະກັນຄຸນນະພາບ ພາຍໃນ 7 ເມືອງເປົ້າໝາຍ (ສໍາລັບຫ້ອງການສຶກສາ ແລະ ກິລາເມືອງຕະໂອ້ຍ ແລະ ພະແນກສຶກສາທິການ ແລະ ກິລາແຂວງສາລະວັນ ແມ່ນໄດ້ຮັບອຸປະກອນໂອຊີທີຈາກກົມປະກັນຄຸນນະພາບການສຶກສາ ກ່ອນໜ້ານີ້ແລ້ວ). ອຸປະກອນທີ່ໄດ້ປະກອບໃຫ້ແກ່ພະນັກງານປະກັນຄຸນນະພາບຂັ້ນທ້ອງຖິ່ນ ໃນຄັ້ງນີ້ ໄດ້ຮັບການສະໜັບສະໜູນ ພາຍໃຕ້ໂຄງການຮ່ວມມືຂອງອົງການຍູນີເຊັບ ແລະ ສະຫະພາບເອີລົບ.
