AQAN - ເຄືອຂ່າຍປະກັນຄຸນນະພາບອາຊຽນ
ໃນລະຫວ່າງປີ 2008 ຫາ 2018, ກົມການສຶກສາຊັ້ນສູງ (DHE) ໄດ້ເປັນສະມາຊິກສົມບູນຂອງ AQAN ຕາງໜ້າໂດຍ ທ່ານນາງ ພອນເພັດ ບຸບຜາ ຫົວໜ້າກົມການສຶກສາຊັ້ນສູງ. ໃນເດືອນກັນຍາ 2017, AQAN ໄດ້ດໍາເນີນກອງປະຊຸມຄະນະບໍລິຫານງານ AQAN ແລະ ກອງປະຊຸມວິຊາການ ການປະກັນຄຸນນະພາບ ໂດຍການເປັນເຈົ້າພາບຮ່ວມລະຫວ່າງ DHE ແລະ ESQAC, ທີ່ເມືອງປາກເຊ, ແຂວງຈໍາປາສັກ, ສປປ ລາວ. ນັບຕັ້ງແຕ່ປີ 2018 ປີຕໍ່ໄປ, ສະມາຊິກສົມບູນຂອງ AQAN ຈາກ ສປປ ລາວ ໄດ້ປ່ຽນຈາກ DHE ມາເປັນ ESQAC ຫຼື DEQA ໃນປັດຈຸບັນ.
ກອງປະຊຸມໂຕະມົນ ເປີດໂຕອົງການປະກັນຄຸນນະພາບອາຊຽນຄັ້ງທຳອິດໄດ້ຈັດຂຶ້ນຢູ່ກົວລາລຳເປີ ແຕ່ວັນທີ 06 - 08 ກໍລະກົດ 2008, ໂດຍອົງການຄຸນນະພາບຂອງມາເລເຊຍ (MQA) ແລະ SEAMEO-RIHED ປະຈໍາບາງກອກ. ໂດຍການເຂົ້າຮ່ວມຂອງຫົວໜ້າອົງການປະກັນຄຸນນະພາບ ແລະ ໃນກໍລະນີທີ່ບໍ່ທັນມີອົງການປະກັນຄຸນນະພາບຢ່າງເປັນທາງການ ແມ່ນຜູ້ຕາງໜ້າຈາກກະຊວງທີ່ຮັບຜິດຊອບວຽກງານປະກັນຄຸນນະພາບການສຶກສາຊັ້ນສູງ ຈາກບັນດາປະເທດອາຊຽນ. ໃນຖານະເປັນກອງປະຊຸມໂຕະມົນເປີດໂຕ, ຜູ້ຕາງຫນ້າຈາກບັນດາປະເທດ ໄດ້ສະເໜີສະພາບລວມຂອງວຽກງານປະກັນຄຸນນະພາບການສຶກສາຊັ້ນສູງໃນປະເທດຂອງຕົນ. ການນຳສະເໜີເຫຼົ່ານີ້ໄດ້ຖືກລວບລວມ ແລະ ພິມເຜີຍແຜ່ເປັນວາລະສານ ແລະ ແຈກຢາຍໃຫ້ສະມາຊິກທັງໝົດ.
ເປົ້າໝາຍຫຼັກຂອງກອງປະຊຸມໂຕະມົນຄັ້ງປະຖົມມະເລີກນີ້ ແມ່ນເພື່ອສົ່ງເສີມການສ້າງເຄືອຂ່າຍລະຫວ່າງອົງການປະກັນຄຸນນະພາບ (QA) ຂອງອາຊຽນ, ເພື່ອຮຽນຮູ້ກ່ຽວກັບລະບົບການປະກັນຄຸນນະພາບການສຶກສາຊັ້ນສູງ ເຊິ່ງກັນແລະກັນແລະ ເພື່ອພິຈາລະນາການສ້າງຕັ້ງເຄືອຂ່າຍ QA ຂອງອາຊຽນ.
ກອງປະຊຸມໂຕະມົນປີ 2008 ໄດ້ເຫັນດີຮັບຮອງເອົາຖະແຫຼງການ Kuala Lumpur ກ່ຽວກັບການສ້າງຕັ້ງເຄືອຂ່າຍປະກັນຄຸນນະພາບອາຊຽນ (AQAN).
