AQRF

ຂອບວຸດທິອາຊຽນ (AQRF) ເປັນຂອບວຸດທິເພື່ອການອ້າງອີງລວມ ເພື່ອຊ່ວຍໃຫ້ສາມາດປຽບທຽບວຸດທິການສຶກສາລະຫວ່າງບັນດາປະເທດສະມາຊິກອາຊຽນ (AMS).

ຈຸດປະສົງຂອງ AQRF ປະກອບດ້ວຍ:

• ສະໜັບສະໜູນການຮັບຮູ້ວຸດທິ
• ພັດທະນາຂອບວຸດທິເພື່ອຊຸກຍູ້ການຮຽນຮູ້ຕະຫຼອດຊີວິດ
• ພັດທະນາວິທີການຢັ້ງຢືນການສຶກສານອກໂຮງຮຽນ
• ສົ່ງເສີມການເຄື່ອນຢ້າຍຂອງຜູ້ຮຽນ ແລະ ຜູ້ອອກແຮງງານ
• ພາໃຫ້ມີຄວາມເຂົ້າໃຈດີຂຶ້ນ ຕໍ່ລະບົບວຸດທິ
• ສົ່ງເສີມຄຸນນະພາບຂອງລະບົບວຸດທິໃຫ້ດີຂຶ້ນ

AQRF ຖືກພັດທະນາຂຶ້ນ ອີງໃສ່ຄວາມເຂົ້າໃຈທີ່ຕົກລົງເປັນເອກະພາບກັນລະຫວ່າງ AMS. ໂດຍການອອກແບບ, ໃຫ້ມັນມີຈຸດປະສົງທີ່ຈະມີອິດທິພົນແບບເປັນກາງຕໍ່ຂອບວຸດທິແຫ່ງຊາດ (NQF) ຂອງແຕ່ລະປະເທດ AMS ທີ່ເຂົ້າຮ່ວມ. ເຊິ່ງແຕ່ລະປະເທດ AMS ແມ່ນຖືກເຊື້ອເຊີນໃຫ້ເຂົ້າຮ່ວມໃນ AQRF ດ້ວຍຄວາມສະໝັກໃຈ ທັງການມີສ່ວນຮ່ວມ ແລະ ການຈັດຕັ້ງປະຕິບັດ. ສິ່ງສໍາຄັນກວ່ານັ້ນ, ການມີສ່ວນຮ່ວມໃນ AQRF ບໍ່ຈໍາເປັນຕ້ອງປ່ຽນແປງລະບົບວຸດທິແຫ່ງຊາດ (NQS). AQRF ເຄົາລົບໂຄງສ້າງທີ່ເປັນເອກະລັກສະເພາະ ແລະຂະບວນການໃນການເຂົ້າຮ່ວມຂອງ AMS ເພື່ອຮັກສາລະດັບຄວາມຮັບຜິດຊອບຕໍ່ກັບບູລິມະສິດແຫ່ງຊາດຂອງຕົນ.

AQRF ໄດ້ຮັບການຮັບຮອງຈາກບັນດາລັດຖະມົນຕີເສດຖະກິດອາຊຽນ (AEM) ໃນເດືອນສິງຫາ 2014; ລັດຖະມົນຕີສຶກສາອາຊຽນ (ASED) ໃນເດືອນກັນຍາ 2014; ແລະ ລັດຖະມົນຕີແຮງງານອາຊຽນ (ALMM) ໂດຍຜ່ານການລົງປະຊາມະຕິແຕ່ເດືອນພະຈິກ 2014 ຫາເດືອນພຶດສະພາ 2015.

ຫຼັງຈາກນັ້ນ, ເອກະສານກ່ຽວກັບໂຄງສ້າງ ແລະ ການຄຸ້ມຄອງ AQRF ໄດ້ຮັບການຮັບຮອງໂດຍ ALMM ແລະ ASED ໃນເດືອນພຶດສະພາ 2016, ແລະ AEM ໃນເດືອນສິງຫາ 2016, ເຊິ່ງໄດ້ສະຫນອງບ່ອນອີງພື້ນຖານໃນການສ້າງຕັ້ງຄະນະກໍາມະການຂອບວຸດທິອາຊຽນ ເພື່ອຈັດຕັ້ງປະຕິບັດ AQRF.