ກອງປະຊຸມກວດກາເນື້ອໃນຮອບດ້ານຂັ້ນວິຊາການ ຮ່າງກົດໝາຍວ່າດ້ວຍການສຶກສາ ເພື່ອນໍາສະເໜີຕໍ່ຄະນະປະຈໍາສະພາແຫ່ງຊາດ

ກອງປະຊຸມຄັ້ງນີ້ ໄດ້ຮັບຟັງການລາຍງານ ຜົນການຄົ້ນຄວ້າເນື້ອໃນຮອບດ້ານ ພ້ອມທັງການປະກອບຄໍາຄິດຄໍາເຫັນຂອງຜູ້ເຂົ້າຮ່ວມ ເຊິ່ງເນື້ອໃນສ່ວນໃຫຍ່ຂອງກົດໝາຍ ໄດ້ຖືກຮັບຮອງເປັນເອກະພາບ; ແຕ່ກໍ່ຍັງມີບາງປະເດັນທີ່ກອງປະຊຸມໄດ້ຍົກຂຶ້ນ ແລະ ສົນທະນາກັນຢ່າງຟົດຟື້ນ ກົງໄປກົງມາ ຕາມຫຼັກການພັດທະນານິຕິກໍາ ພ້ອມທັງປະກອບຂໍ້ມູນເພີ່ມເຕີມ ໂດຍໄດ້ເຫັນດີ ໃຫ້ມີການປັບປຸງຄືນໃໝ່ບາງມາດຕາ ເປັນຕົ້ນ ມາດຕາ 3 ການອະທິບາຍຄໍາສັບ, ມາດຕາ 4 ນະໂຍບາຍຂອງລັດກ່ຽວກັບວຽກງານສຶກສາ (ການສຶກສາພາກບັງຄັບ ໂດຍບໍ່ເສຍຄ່າ), ມາດຕາ 15 ໂຄງປະກອບສາມັນສຶກສາ, ມາດຕາ 19 ໂຄງປະກອບການສຶກສາຊັ້ນສູງ, ມາດຕາ 31 ປະເພດສະຖານການສຶກສາ, ມາດຕາ 33 ການສ້າງຕັ້ງສະຖານການສຶກສາ, ມາດຕາ 36 ຫຼັກສູດການສຶກສາ (ຄວາມແທດເໝາະຂອງການນໍາໃຊ້ຄໍາສັບ “ຫຼັກສູດສອງພາສາ”), ມາດຕາ 56-57 ໜ້າທີ່ ແລະ ພັນທະຂອງຄູ ແລະ ບັນດາມາດຕາທີ່ກ່ຽວຂ້ອງກັບການລົງທຶນໃສ່ການສຶກສາ, ກອງທຶນສົ່ງເສີມການສຶກສາ, ໜ້າທີ່ຂອງຄະນະກໍາມະການປົກຄອງທ້ອງຖິ່ນ, ຄະນະພັດທະນາການສຶກສາທ້ອງຖິ່ນ ແລະ ອື່ນໆ.