ກອງປະຊຸມ ບັ້ນດໍາເນີນຊີວິດການເມືອງຄົບຄະນະທ້າຍສະໄໝ ແລະ ທາບທາມບຸກຄະລາກອນຮອບທີ2 ຂອງໜ່ວຍພັກຮາກຖານກົມປະກັນຄຸນນະພາບການສຶກສາ
ໃນວັນທີ 25-26 ກັນຍາ 2024 ທີ່ຜ່ານມາ ຢູ່ທີ່ຫ້ອງປະຊຸມຊັ້ນ 3 ກະຊວງສຶກສາທິການ ແລະ ກິລາ (ເຂດເຈົ້າອານຸວົງ) ໜ່ວຍພັກຮາກຖານກົມປະກັນຄຸນນະພາບການສຶກສາ ໄດ້ຈັດກອງປະຊຸມ ບັ້ນດໍາເນີນຊີວິດການເມືອງຄົບຄະນະທ້າຍສະໄໝ ແລະ ທາບທາມບຸກຄະລາກອນ ຮອບທີ 2 ຂຶ້ນ ພາຍໃຕ້ການເປັນປະທານຂອງ ສະຫາຍ ບຸນມີ ຈັນທະອຸດົມ ຄະນະພັກກະຊວງ ປະທານກວດກາ ຫົວໜ້າກົມກວດກາ, ຮອງຫົວໜ້າ ຄະນະຮັບຜິດຊອບກະກຽມ ແລະ ດໍາເນີນກອງປະຊຸມໃຫຍ່ 3 ຂັ້ນ ຂອງພັກ ທີ່ຂຶ້ນກັບອົງຄະນະພັກກະຊວງສຶກສາທິການ ແລະ ກິລາ (ກຸ່ມ4) ແລະ ສະຫາຍ ປັນຍາ ຈັນທະວົງ ຮອງເລຂາໜ່ວຍພັກຮາກຖານ ວ່າການແທນ ຫົວໜ້າກົມປະກັນຄຸນນະພາບການສຶກສາ, ກະຊວງສຶກສາທິການ ແລະ ກິລາ ເປັນປະທານຮ່ວມ, ສະຫາຍ ວຽງທອງ ພົນທະຈັກ ຮອງຫົວໜ້າກົມຈັດຕັ້ງ ແລະ ພະນັກງານ, ສະຫາຍ ບຸນຂົງ ຈັກວົງສາ ຫົວໜ້າພະແນກ ກົມກວດກາ ແລະ ວິຊາການກ່ຽວຂ້ອງ ເຂົ້າຮ່ວມຕິດຕາມ ແລະ ສະມາຊິກພັກ ກົມປະກັນຄຸນນະພາບການສຶກສາ ລວມທັງໝົດຈໍານວນ 35 ສະຫາຍ, ຍິງ 15 ສະຫາຍ ເຊິ່ງໃນນັ້ນ ສະມາຊິກພັກສົມບູນ ທີ່ມີສິດລົງຄະແນນສຽງ ຈຳນວນ 22 ສະຫາຍ.
ໃນຕອນເຊົ້າຂອງວັນທີ 25, ໄດ້ສໍາເລັດການຜ່ານບົດສໍາຫຼວດຂອງສະມາຊິກພັກ ຈໍານວນ 12 ສະຫາຍ ແລະ ຄະນະຈຸ ຈໍານວນ 8 ສະຫາຍ ລວມທັງໝົດ 20 ສະຫາຍ ເຊິ່ງພາຍຫຼັງແຕ່ລະສະຫາຍ ໄດ້ອ່ານບົດສໍາຫຼວດ ກໍໄດ້ຮັບການປະກອບຄໍາຄິດເຫັນຈາກໝູ່ຄະນະ ເພື່ອເປັນທິດທາງໃນການປັບປຸງຕົນເອງຂອງແຕ່ລະສະຫາຍ.
ສໍາລັບຕອນເຊົ້າຂອງວັນທີ 26, ໄດ້ສໍາເລັດການຜ່ານບົດສໍາຫຼວດຂອງຄະນະພັກ ຈໍານວນ 3 ສະຫາຍ, ຜ່ານບົດລາຍງານການເມືອງ, ບົດສໍາຫຼວດການນໍາພາລວມຂອງຄະນະພັກ. ຕໍ່ຈາກນັ້ນ ກໍ່ໄດ້ມີການທາບທາມບຸກຄະລາກອນຮອບທີ 2 ເຊິ່ງເປັນການຄັດຈ້ອນ ເປົ້າໝາຍລົງສະໝັກກອງປະຊຸມໃຫຍ່ ຄັ້ງທີ IV ຂອງໜ່ວຍພັກ ຈາກ 7 ສະຫາຍ ໃຫ້ເຫຼືອ 5 ສະຫາຍ.
ກອງປະຊຸມໄດ້ສໍາເລັດລົງຢ່າງຈົບງາມ ເຊິ່ງໜ່ວຍພັກຮາກຖານຈະໄດ້ລາຍງານຜົນໄດ້ຮັບກອງປະຊຸມຕໍ່ຂັ້ນເທິງໂດຍໄວ ເພື່ອສະເໜີຂໍເປີດກອງປະຊຸມໃຫຍ່ຄັ້ງທີ IV ທີ່ຄາດວ່າຈະຈັດຂຶ້ນໃນກາງເດືອນຕຸລາ 2024 ຈະມາເຖິງນີ້.
