ລົງຊຸກຍູ້ ໂຮງຮຽນເຕັກນິກວິຊາຊີບ ແຂວງໄຊສົມບູນ ໃນວຽກງານປະກັນຄຸນນະພາບການສຶກສາ

ໃນໂອກາດທີ່ກົມປະກັນຄຸນນະພາບການສຶກສາໄດ້ລົງມາເຮັດວຽກຄັ້ງນີ້, ທ່ານ ວິກກີ້ ຫວັງເຢັງ ຮອງຜູ້ອຳນວຍການໂຮງຮຽນເຕັກນິກວິຊາຊີບ ແຂວງໄຊສົມບູນ ໄດ້ກ່າວປະຫວັດຄວາມເປັນມາຂອງໂຮງຮຽນໂດຍຫຍໍ້ ເຊິ່ງໄດ້ລິເລີ່ມສ້າງຕັ້ງຂຶ້ນໃນປີ 2019 ປະກອບມີ 5 ສາຂາວິຊາ ຄື: ສ້ອມແປງທົ່ວໄປ, ໄຟຟ້າເຕັກນິກ, ກໍ່ສ້າງ, ກະສິກຳ ແລະ ປູກຝັງລ້ຽງສັດ; ເປັນສະຖານອາຊີວະສຶກສາທີ່ຖືກສ້າງຕັ້ງຂຶ້ນລຸນໝູ່ສຸດ. ເນື່ອງຈາກວ່າແຂວງໄຊສົມບູນ ເປັນເຂດຍຸດທະສາດຂອງ ສ ປ ປ ລາວ ເຮັດໃຫ້ມີສິ່ງທ້າທາຍຫຼາຍດ້ານ ໂດຍສະເພາະແມ່ນ ການພັດທະນາທາງດ້ານການສຶກສາເວົ້າລວມ ແລະ ເວົ້າສະເພາະແມ່ນການຮ່ວມມືກັບພາຍນອກ ລວມເຖິງການຮັບການຊ່ວຍເຫຼືອ ສະໜັບສະໜູນຈາກໂຄງການຕ່າງໆ. ຂໍ້ຈຳກັດໃນດ້ານການຮ່ວມມືກັບພາຍນອກ ເຮັດໃຫ້ການພັດທະນາຂອງໂຮງຮຽນ ຍັງບໍ່ທັນຄ່ອງແຄ້ວ ຖ້າສົມທຽບກັບສະຖານການສຶກສາເຂດອື່ນໆ.

ທ່ານ ສີສັກດາ ບູລົມ ຫົວໜ້າພະແນກຄຸ້ມຄອງຂອບວຸດທິການສຶກສາ ກົມປະກັນຄຸນນະພາບການສຶກສາ ໄດ້ນຳສະເໜີຄວາມໝາຍຄວາມສຳຄັນ ຂອງຄຸນນະພາບການສຶກສາ ແລະ ການປະກັນຄຸນນະພາບການສຶກສາ ເພື່ອສ້າງຄວາມເຂົ້າໃຈໃຫ້ກັບພະນັກງານ, ຄູ ອາຈານພາຍ ໃນໂຮງຮຽນ ແລະ ພ້ອມທີ່ຈະນຳໄປຈັດຕັ້ງປະຕິບັດໃຫ້ມີປະສິດທິພາບ ແລະ ປະສິດທິຜົນ ເພື່ອສາມາດເຊື່ອມໂຍງກ້າວໄປສູ່ສາກົນໃນອານາຄົດ. ນອກຈາກນີ້, ວິທະຍາກອນ ຈາກກົມປະກັນຄຸນນະພາບ ໄດ້ນໍາສະເໜີ ກົນໄກໃນການປະກັນຄຸນນະພາບ ແລະ ຂະບວນການໃນການພັດທະນາ ມາດຕະຖານການປະກັນຄຸນນະພາບສະຖານອາຊີວະສຶກສາ, ພ້ອມທັງລາຍລະອຽດຂອງມາດຕະຖານ ແລະ ຕົວຊີ້ວັດ ເຊິ່ງປະກອບມີ 10 ມາດຕະຖານ ແລະ 45 ຕົວຊີ້ວັດ. ຈາກນັ້ນ, ໄດ້ໃຫ້ຜູ້ເຂົ້າຮ່ວມສຶກສາຄົ້ນຄວ້າເນື້ອໃນລະອຽດ ແລະ ໄດ້ມີການຖາມຕອບ.

ວາລະຕໍ່ມາ ວິທະຍາກອນຈາກກົມປະກັນຄຸນນະພາບການສຶກສາ ໄດ້ນຳສະເໜີກ່ຽວກັບຂະບວນການປະເມີນຕົນເອງ, ການຕີລາຄາລະດັບຄຸນນະພາບຂອງສະຖານອາຊີວະສຶກສາ ແລະ ການຂຽນບົດລາຍງານປະເມີນຕົນເອງ (SAR). ຈາກນັ້ນ, ໄດ້ແບ່ງກຸ່ມເພື່ອທົດລອງປະເມີນຕົນເອງຕາມມາດຕະຖານ ແລະ ຕົວຊີ້ວັດ, ພ້ອມທັງຕີລາຄາລະດັບຄຸນນະພາບຂອງໂຮງຮຽນ. ພາຍຫຼັງສຳເລັດການທົດລອງປະເມີນຕົນເອງແລ້ວ, ໄດ້ມີການນຳສະເໜີແລກປ່ຽນຄຳຄິດເຫັນ ແລະ ວາງແຜນປັບປຸງຄຸນນະພາບຕາມຜົນການປະເມີນ.

ຜົນການທົດລອງປະເມີນຕົນເອງ ແລະ ແລກປ່ຽນຄຳຄິດເຫັນ ສາມາດສັງລວມໄດ້ດັ່ງນີ້: ຍັງມີຫຼາຍຕົວຊີ້ວັດ ທີ່ໂຮງຮຽນບໍ່ທັນໄດ້ມີການຈັດຕັ້ງປະຕິບັດ, ການຕີລາຄາລະດັບຄຸນນະພາບຂອງໂຮງຮຽນແມ່ນໄດ້ລະດັບທີ່ຍັງຕ້ອງໄດ້ປັບປຸງຫຼາຍ. ພະນັກງານ ຄູອາຈານຫຼາຍທ່ານ ແມ່ນໄດ້ຮັບຟັງ ແລະ ຮັບຮູ້ ກ່ຽວກັບວຽກງານປະກັນຄຸນນະພາບ ເປັນຄັ້ງທຳອິດ ແຕ່ກໍ່ໄດ້ໃຫ້ຄວາມສົນໃຈ ແລະ ພ້ອມທີ່ຈະນຳເອົາ ຕົວຊີ້ວັດດັ່ງກ່າວ ໄປເປັນບ່ອນອີງໃນການຈັດຕັ້ງປະຕິບັດວຽກງານ ເພື່ອໃຫ້ໄດ້ຄຸນນະພາບຕາມມາດຕະຖານທີ່ກຳນົດ.